Mais de 100 profesionais do ámbito 0-6, dos servizos de Atención Temperá, escolas infantís, centros de saúde e servizos sociais, reuníronse onte en Santiago na Xornada Técnica Interdisciplinaria organizada pola AGAT con motivo do 10 aniversario da creación das UDIAF
Na presentación, Jaime Ponte, Presidente da AGAT, expuxo a necesidade de facer dos servizos comunitarios de proximidade o eixo das políticas de apoio as familias cando teñen que afrontar situacións adversas ou problemáticas na crianza. E recordou o traballo feito para fundamentar a Rede Galega de Atención Temperá cuxa síntese recóllese na publicación “UDIAFS. 10 ANOS DE INVESTIGACIÓN E ATENCIÓN TEMPERÁ”.
Pola súa parte Ildefonso de la Campa, Director Xeral de Maiores e Persoas con Discapacidade, fixo referencia ao cambio de paradigma que supuxo o Decreto 183/2013 polo que se crea a Rede Galega, dando conta de que actualmente alcanza xa 92 concellos, o 30% da extensión territorial de Galicia, o que significa que se multiplicou por seis nos últimos anos.
No acto inaugural, participaron tamén representantes das Consellerías de Educación e Sanidade, que xunto coa Consellería de Política Social, conforman o Consello Autonómico de Atención Temperá, así como o Presidente da Federación Española de Asociacións de Atención Temperá, Jose Luis Peña Segura.
